ਨਵੀਂ ਦਿੱਲੀ, 25 ਅਪਰੈਲ (ਖਬਰ ਖਾਸ ਬਿਊਰੋ)
ਭਾਰਤ ਸੋਮਵਾਰ ਨੂੰ ਰਾਫੇਲ-ਮਰੀਨ ਲੜਾਕੂ ਜਹਾਜ਼ਾਂ ਦੀ ਖ਼ਰੀਦ ਲਈ ਫਰਾਂਸ ਨਾਲ ਇਕ ਸਮਝੌਤੇ ’ਤੇ ਦਸਤਖ਼ਤ ਕਰਨ ਲਈ ਤਿਆਰ ਹੈ। ਇਸ 63,000 ਕਰੋੜ ਰੁਪਏ ਦੇ ਸੌਦੇ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਸੁਰੱਖਿਆ ਬਾਰੇ ਕੈਬਨਿਟ ਕਮੇਟੀ ਨੇ 9 ਅਪਰੈਲ ਨੂੰ ਮਨਜ਼ੂਰੀ ਦੇ ਦਿੱਤੀ ਸੀ। ਇਸ ਸਮਝੌਤੇ ’ਤੇ ਨਵੀਂ ਦਿੱਲੀ ਵਿਚ ਦਸਤਖ਼ਤ ਕੀਤੇ ਜਾਣਗੇ ਅਤੇ ਇਸ ਵਿਚ 26 ਰਾਫੇਲ-ਮਰੀਨ ਜੈੱਟ, ਹਥਿਆਰ, ਸਿਮੂਲੇਟਰ, ਸਪੇਅਰ ਪਾਰਟਸ ਅਤੇ ਲੌਜਿਸਟਿਕਸ ਸਹਾਇਤਾ ਦੀ ਖਰੀਦ ਸ਼ਾਮਲ ਹੈ।
ਰਾਫੇਲ-ਮਰੀਨ ਜੈੱਟ ਭਾਰਤੀ ਸਮੁੰਦਰੀ ਫ਼ੌਜ ਦੀ ਸਮਰੱਥਾ ਨੂੰ ਕਾਫ਼ੀ ਵਧਾਏਗਾ, ਜਿਸ ਵਿਚ ਲੰਬੀ ਦੂਰੀ ਵਾਲੀਆਂ ਸਟ੍ਰਾਈਕ ਮਿਜ਼ਾਈਲਾਂ ਅਤੇ 650 ਕਿਲੋਮੀਟਰ ਦੀ ਦੂਰੀ ਦੀ ਸਕੈਲਪ-ਈਜੀ ਕਰੂਜ਼ ਮਿਜ਼ਾਈਲ ਨੂੰ ਲਿਜਾਣ ਦੀ ਸਮਰੱਥਾ ਵਰਗੀਆਂ ਵਿਸ਼ੇਸ਼ਤਾਵਾਂ ਹਨ। ਜੈੱਟ 22 ਸਿੰਗਲ-ਸੀਟਰ ਅਤੇ ਚਾਰ ਟਵਿਨ-ਸੀਟਰ ਮੁੱਖ ਤੌਰ ’ਤੇ ਸਵਦੇਸ਼ੀ ਤੌਰ ’ਤੇ ਬਣੇ ਏਅਰਕ੍ਰਾਫਟ ਕੈਰੀਅਰ ਆਈਐੱਨਐੰਸ ਵਿਕ੍ਰਾਂਤ ’ਤੇ ਤਾਇਨਾਤ ਕੀਤੇ ਜਾਣਗੇ ਅਤੇ ਸੰਕਟ ਦੀ ਸਥਿਤੀ ਵਿੱਚ ਭਾਰਤੀ ਹਵਾਈ ਸੈਨਾ ਵੱਲੋਂ ਵਰਤੇ ਜਾ ਸਕਦੇ ਹਨ।
ਜੈੱਟਾਂ ਦੇ ਡਿਲਿਵਰੀ ਇਕਰਾਰਨਾਮੇ ਦੇ ਇਸ ’ਤੇ ਸਹੀ ਪਾਏ ਜਾਣ ਤੋਂ ਤਿੰਨ ਸਾਲਾਂ ਬਾਅਦ ਸ਼ੁਰੂ ਹੋਣ ਦੀ ਉਮੀਦ ਹੈ, ਜਿਸ ਨਾਲ ਪੂਰਾ ਬੇੜਾ 2031 ਤੱਕ ਮੌਜੂਦ ਹੋ ਜਾਵੇਗਾ। ਗ਼ੌਰਤਲਬ ਹੈ ਕਿ ਰਾਫੇਲ-ਮਰੀਨ ਜੈੱਟ ਪੁਰਾਣੇ ਮਿਗ-29 ਕੇ ਫਲੀਟ ਦੀ ਥਾਂ ਲੈਣਗੇ, ਜੋ ਕਿ 2011 ਤੋਂ ਸੇਵਾ ਵਿੱਚ ਹੈ। ਨਵੇਂ ਜੈੱਟ ਜਲ ਸੈਨਾ ਦੀਆਂ ਸਮਰੱਥਾਵਾਂ ਵਿੱਚ ਇੱਕ ਅਹਿਮ ਅਪਗ੍ਰੇਡ ਪ੍ਰਦਾਨ ਕਰਨਗੇ, ਜਿਸ ਵਿੱਚ ਫੋਲਡੇਬਲ ਵਿੰਗ ਅਤੇ ਮਜ਼ਬੂਤ ਲੈਂਡਿੰਗ ਗੀਅਰ ਵਰਗੀਆਂ ਵਿਸ਼ੇਸ਼ਤਾਵਾਂ ਹਨ।