ਚੰਡੀਗੜ੍ਹ 22 ਮਈ ( ਖ਼ਬਰ ਖਾਸ ਬਿਊਰੋ)
ਸਰਕਾਰ ਵਲੋਂ ਪਟਿਆਲਾ ਜ਼ਿਲ੍ਹੇ ਦੇ 8 ਪਿੰਡਾਂ ਨੂੰ ਮੋਹਾਲੀ ਜ਼ਿਲ੍ਹੇ ਵਿੱਚ ਸ਼ਾਮਲ ਕਰਨ ਦਾ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਗਿਆ ਹੈ। ਇਹ ਫੈਸਲਾ ਲੰਬੇ ਸਮੇਂ ਤੋਂ ਚੱਲ ਰਹੀ ਲੋਕਾਂ ਦੀ ਮੰਗ ਅਤੇ ਸਰਕਾਰੀ ਪ੍ਰਕਿਰਿਆ ਤੋਂ ਬਾਅਦ ਲਿਆ ਗਿਆ ਹੈ। ਹੁਣ ਇਹ ਪਿੰਡ ਵਧੀਆ ਸ਼ਹਿਰੀ ਸੁਵਿਧਾਵਾਂ ਨਾਲ ਨਾਲ ਉੱਚੇ ਸਰਕਲ ਰੇਟਾਂ ਦੇ ਲਾਭ ਵੀ ਲੈ ਸਕਣਗੇ।
ਸ਼ਾਮਲ ਕੀਤੇ ਗਏ ਪਿੰਡ ਇਹ ਹਨ:
ਮਾਣਕਪੁਰ, ਖੇੜਾ ਗੰਜੂ, ਊਰਨਾ, ਚੰਗੇਰਾ, ਊਚਾ ਖੇੜਾ, ਗੁਰਦਿਤਪੁਰਾ, ਹਦਿਤਪੁਰਾ ਅਤੇ ਲਹਲਾ।
ਇਸ ਸੰਬੰਧ ਵਿੱਚ ਪੰਜਾਬ ਵਿਧਾਨ ਸਭਾ ਵਿੱਚ ਹਾਲ ਹੀ ਵਿੱਚ ਇੱਕ ਪ੍ਰਸਤਾਵ ਵੀ ਪਾਸ ਕੀਤਾ ਗਿਆ ਸੀ। ਦੱਸਣਯੋਗ ਹੈ ਕਿ ਮੋਹਾਲੀ ਜ਼ਿਲ੍ਹੇ ਦੇ ਸਰਕਲ ਰੇਟ ਪਟਿਆਲਾ ਨਾਲੋਂ ਕਾਫੀ ਵਧੇਰੇ ਹਨ, ਜਿਸ ਕਾਰਨ ਜਮੀਨਾਂ ਦੀ ਕੀਮਤ ਵਿੱਚ ਨੋਟਿਸਯੋਗ ਵਾਧਾ ਹੋਣ ਦੀ ਸੰਭਾਵਨਾ ਹੈ।
ਇਹ ਪ੍ਰਕਿਰਿਆ ਪਿਛਲੇ ਦੋ ਮਹੀਨਿਆਂ ਤੋਂ ਚੱਲ ਰਹੀ ਸੀ। ਮੋਹਾਲੀ ਵਿੱਚ ਇਹ ਪਿੰਡ ਸ਼ਾਮਲ ਕਰਨ ਦੀ ਮੰਗ ਇਲਾਕਾ ਵਾਸੀਆਂ ਵੱਲੋਂ ਲੰਬੇ ਸਮੇਂ ਤੋਂ ਕੀਤੀ ਜਾ ਰਹੀ ਸੀ। ਇਸ ਸਬੰਧੀ ਇਲਾਕਾ ਵਿਧਾਇਕ ਨੀਨਾ ਮਿੱਤਲ ਵੱਲੋਂ ਵੀ ਇਕ ਅਧਿਕਾਰਤ ਪੱਤਰ ਭੂ-ਅਭਿਲੇਖ ਵਿਭਾਗ ਨੂੰ ਭੇਜਿਆ ਗਿਆ ਸੀ। ਉਸ ਦੇ ਆਧਾਰ ‘ਤੇ ਸਰਕਾਰ ਵੱਲੋਂ ਮੁੜ ਗਠਨ ਦੀ ਰਿਪੋਰਟ ਤਿਆਰ ਕਰਕੇ ਜ਼ਮੀਨ ਰਿਕਾਰਡ ਜਾਲੰਧਰ ਦੇ ਡਿਪਟੀ ਡਾਇਰੈਕਟਰ ਨੂੰ ਅੱਗੇ ਦੀ ਕਾਰਵਾਈ ਲਈ ਪੱਤਰ ਭੇਜਿਆ ਗਿਆ।
ਇਸ ਫੈਸਲੇ ਨਾਲ ਇਲਾਕਾ ਵਾਸੀਆਂ ਨੂੰ ਨਿਰੰਤਰ ਵਿਕਾਸ, ਵਧੀਆ ਇਨਫਰਾਸਟ੍ਰੱਕਚਰ ਅਤੇ ਪ੍ਰਸ਼ਾਸਕੀ ਸਹੂਲਤਾਂ ਦਾ ਲਾਭ ਮਿਲਣ ਦੀ ਸੰਭਾਵਨਾ ਹੈ।