ਚੰਡੀਗੜ੍ਹ 7 ਜੂਨ ( ਖ਼ਬਰ ਖਾਸ ਬਿਊਰੋ)
ਪੰਜਾਬ ਸਰਕਾਰ ਦੇ ਮੁਲਾਜ਼ਮ ਆਪਣੀ ਬਦਲੀ ਕਰਵਾਉਣ ਲਈ 23 ਜੂਨ ਤੋਂ ਅਰਜ਼ੀ ਦੇ ਸਕਣਗੇ। ਪੰਜਾਬ ਸਰਕਾਰ ਦੇ ਪ੍ਰੋਸੋਨਲ ਵਿਭਾਗ ਨੇ ਆਮ ਬਦਲੀਆਂ ਸਬੰਧੀ ਜਾਰੀ ਕੀਤੇ ਪੱਤਰ ਵਿਚ ਸਪਸ਼ਟ ਕੀਤਾ ਹੈ ਕਿ ਆਮ ਬਦਲੀਆਂ 23 ਜੂਨ ਤੋਂ ਇਕ ਅਗਸਤ ਤੱਕ ਹੋਣਗੀਆਂ ਅਤੇ ਇਕ ਅਗਸਤ ਤੋਂ ਬਾਅਦ ਬਦਲੀ ਜਾਂ ਤੈਨਾਤੀ ਪ੍ਰੋਸੋਨਲ ਵਿਭਾਗ ਦੀ ਟਰਾਂਸਫਰ ਪਾਲਸੀ 23 ਅਗਸਤ 2018 ਅਨੁਸਾਰ ਹੀ ਹੋਵੇਗੀ।
ਪ੍ਰੋਸੋਨਲ ਵਿਭਾਗ ਨੇ ਵੱਖ-ਵੱਖ ਵਿਭਾਗਾਂ ਦੇ ਮੁਖੀਆ, ਪ੍ਰਬੰਧਕੀ ਸਕੱਤਰਾਂ, ਡਿਵਿਜਨਲ ਕਮਿਸ਼ਨਰਾਂ, ਡਿਪਟੀ ਕਮਿਸ਼ਨਰਾਂ, ਉਪ ਮੰਡਲ ਅਫ਼ਸਰਾਂ, ਬੋਰਡਾਂ, ਕਾਰਪੋਰੇਸ਼ਨਾਂ ਦੇ ਚੇਅਰਮੈਨਾਂ ਅਤੇ ਮੈਨੇਜਿੰਗ ਡਾਇਰੈਕਟਰਾਂ ਨੂੰ ਜਾਰੀ ਕੀਤੇ ਪੱਤਰ ਵਿਚ ਕਿਹਾ ਕਿ ਆਮ ਬਦਲੀਆਂ 23 ਜੂਨ ਤੋਂ ਇਕ ਅਗਸਤ ਤੱਕ ਹੋਣਗੀਆਂ।
ਬਦਲੀਆਂ ਨੂੰ ਲੈ ਕੇ ਹੁਣ ਸਕੱਤਰੇਤ ਵਿਚ ਚਹਿਲ ਪਹਿਲ ਸ਼ੁਰੂ ਹੋ ਜਾਵੇਗੀ। ਵਿਧਾਇਕ, ਆਮ ਲੋਕ, ਅਫ਼ਸਰ ਅਤੇ ਸੱਤਾ ਤੱਕ ਪਹੁੰਚ ਰੱਖਣ ਵਾਲੇ ਬਦਲੀ ਕਰਵਾਉਣ ਲਈ ਮੰਤਰੀਆਂ ਅਤੇ ਉਚ ਅਫ਼ਸਰਾਂ ਦੇ ਦਫ਼ਤਰਾਂ ਵਿਚ ਬੈਠੇ ਦਿਖਣਗੇ। ਬਦਲੀਆਂ ਨੂੰ ਲੈ ਕੇ ਮੁਲਾਜ਼ਮਾਂ ਵਿਚ ਬਹੁਤ ਉਤਸੁਕਤਾ ਹੁੰਦੀ ਹੈ।
ਵਰਨਣਯੋਗ ਹੈ ਕਿ ਪਹਿਲਾਂ ਸਰਕਾਰ ਨੇ ਮੁਲਾਜ਼ਮਾਂ, ਕਰਮਚਾਰੀਆਂ ਦੀਆਂ ਬਦਲੀ ਦੀ ਤਾਰੀਖ 15 ਜੁਲਾਈ ਤੋਂ 15 ਅਗਸਤ 2025 ਤੱਕ ਨਿਰਧਾਰਤ ਕੀਤੀ ਸੀ, ਹੁਣ ਤਾਰੀਖ ਵਿਚ ਸੋਧ ਕਰਕੇ 23 ਜੂਨ ਤੋਂ ਇਕ ਅਗਸਤ ਤੱਕ ਕਰ ਦਿੱਤੀ ਹੈ।